About the Book

या पुस्तकातील लेख हे लेखक डॉ. वसंत काळपांडे यांच्या प्रशासकीय अनुभवांची, प्रशासनविषयक चिंतनाची आणि चौफेर वाचनाची साक्ष देतात. या पुस्तकाच्या माध्यमातून त्यांनी शिक्षकांशी व मुख्याध्यापकांशी एक प्रकारे काहीसे अनौपचारिक असे हितगूज केलेले दिसून येते. प्रयोगशील मुख्याध्यापकांसमोर तसेच शिक्षकांसमोर येणार्‍या अध्यापनविषयक, प्रशासकीय स्वरूपाच्या आणि शिक्षक-पालक संबंधांविषयीच्या अनेकविध समस्यांची उकल कशी करावी, याचे मार्गदर्शन लेखकाने या पुस्तकातून केले आहे. शालेय वातावरणात विद्यार्थ्यांचा विविधांगी विकास साधत असताना शिक्षक-शिक्षक, शिक्षक-मुख्याध्यापक, शिक्षक-पालक आणि विद्यार्थी-विद्यार्थी या व अशा परस्पर संबंधांतून उद्भवणार्‍या समस्यांची दखल लेखकाने घेतली असून, केवळ तात्त्विक चर्चा न करता उदाहरणे देऊन प्रत्येक समस्या स्पष्ट केली आहे. शिक्षण संस्थांमध्ये विविध स्तरांवर कार्य करणार्‍या प्रशासकांना व अध्यापकांना त्यांच्या कार्यात या पुस्तकामुळे बहुमोल मार्गदर्शन मिळेल. अध्यापक विद्यालये आणि शिक्षणशास्त्र महाविद्यालये यातून काम करणार्‍या प्राध्यापकांना आणि प्रशिक्षणार्थ्यांना हे पुस्तक नक्कीच उपयुक्त ठरेल.